झिंग

... झिंग ...

" अरे तुला काय माहीत तुझ्या बापाने तुझ्यासाठी काय काय कष्ट घेतलेत? आज मला विचारतोस तुम्ही माझ्यासाठी काय केलंस? पंधरा पंधरा तास काम करुन आताही तेवढीच काम करायची धमक आहे माझ्यात..
समजू नको तुझ्या बापाचं वय झालंय, फक्त अठ्ठावन्नचाच आहे मी. तू कमवतोस त्याच्या तिप्पट आजही कमवतो मी. "
दोन क्वॉर्टर पोटात गेल्या होते त्याच्या. ऑफिस सुटल्यावर नेहमीच्या जागेवर बसून त्याने दोन क्वॉर्टर पोटात टाकल्या आणि मग स्वतःच्या बाईक वर बसून तो बडबडत होता...
" दहा वर्ष कांग्रेस हाऊस मधून रांडाचा धंदा केला. अरे त्या रांडा सुद्धा बोलायच्या हा पोरगा नेहमी हवा आपल्याला. टॅक्सी समय पे लेके आता है और कभी कुछ बोलता भी नहीं. दरदिवशी चौघी पन्नास रुपये द्यायच्या. त्यांच्या सोबतचे भडवे सुद्धा बोलायचे.. साल्ला तू लकी है रे.. ये औरतें भी तुझे मानती है. बँकेतली नोकरी करुनच टॅक्सी चालवायचो मी, इतर टॅक्सीवाले जळायचे माझ्यावर.. विलास की टॅक्सी इतना कैसे कमाती है?? याचा हेवा होता त्यांना.
आणि तू आज बोलतो माझा बाप नालायक आहे. अरे साल्या अभ्यास करायच्या वेळी उनाडक्या करायला मी सांगितले होते का? नववीत तीन वर्ष काढल्यावर सुद्धा तुला एकदातरी हात लावलेला का? म्हणे मला चांगली नोकरी मिळवून नाही दिली. माझी पस्तीस हजाराची नोकरी तुला सोडली की? नाहीतर तुला बँकेत उभं तरी केलं असतं का? नववी नापासाला झाडू काढायची तरी नोकरी मिळतं का रे भाड्या? "
समोर कोणीही नव्हते तरी तो समोरच्या अंधाराशी बोलत होता.
" बायको आल्यापासूनच तुझी नाटकं सुरु झालीत. एकूलता एक तू.. पण तसा वागलास का कधी?
बँकेतून पगार आल्यानंतर कधी एक पैसा तरी हातावर टेकलास का?
आठ वर्ष पोरं झाली नाही म्हणून चार लाखाचा खर्च तुझ्या या बापानेच केला ना?
दिवसभर नोकरी आणि रात्री टॅक्सी चालवून घेतलेली खोली तुला लहान वाटायला लागली म्हणून मिळालेली सर्विस घेऊन शेजारची खोली घेतली तरी तूला मोठ्या घरात जायचं होतं. पंधरा हजार कमवणारा तू.. तुला रे काय जमणार?
सासऱ्याबरोबर परस्पर जाऊन तिकडे कामोठ्याला कुठल्याश्या बिल्डींग मध्ये खोली बघून आलास..
बापाला अंधारात ठेवून.
जेव्हा पैसे भरायचे आले तेव्हा माझ्या कमाईवर डोळा? खोली विका.. सांगायला लाजा नाही वाटल्या काय रे?
तेव्हा सासऱ्याला सुद्धा हाकलून लावले म्हणून कीती चिडलेलास? पण दुसरा काही पर्याय नाही म्हणून पुन्हा माझ्याच पायाशी आलास ना? अरे वाळकेश्वरची खोली सोडून तिकडे कामोठ्याला कसला रे जातोस तू?
बायको तरी कसली शोधून आणलीस तू. पोराच्या वाढदिवसाला केक कापायला प्लॅस्टिक सुरी सापडत नव्हती म्हणून कोणी मोठा सुरा देतो का? तेच मी बोललो. एवढ्या लहान मुलांत कोणाला लागलं वगैरे तर नको तो ताप व्हायचा.. तर ती गेली दोन वर्षे माझ्याशी बोलली नाही. तू तर बायकोचा बैल... तू कशाला विचारतोस तिला? "
समोरचा अंधार अजून गडद होत होता. येणारे जाणारे त्याच्याकडे विचित्र नजरेने बघत जात होते. कोणी हसत होते तर कोणी खिल्ली उडवीत होते.
तो मात्र आपल्याच धुंदीत बोलत होता...
" आता तरी..
पोरांसाठी दुध आणायला मला पाठवलंस? सकाळी शंभरचे रात्री शंभर चे, पैसे देतोस का कधी?
आतातरी कोण्या मित्राला टिव्ही घ्यायचीय म्हणून मला फोन करुन सांगितलंस की बाबा तुम्ही जा दुध आणायला. तुमचा नोकर आहे का मी? मित्र मोठा की बाप एवढी समजायची अक्कल नाही तुम्हाला.. बापाला विका आता आणि खा वाटून मित्रांमध्ये.. "
दोन क्वॉर्टरचा असर आता दिसू लागला. डोळे लाल झाले, जीभ अडखळू लागली.
इतक्यात वरच्या खिशातला फोन वाजला....
" कोण आहे च्या आयला... "
फोन बाहेर काढून किलकिलत्या डोळ्याने नाव वाचलं...
विराज...
" हां बोल रे... "
" बाबा.. मिळालं का दुध? " पलीकडून
" नाही.. जातोय आता, उशीर झालाय ऑफिसमधून निघताना "
" बाबा तुम्हाला उशीर कशामुळे होतो हे माहीत आहे मला चांगलंच.. लवकर जा, दुध संपलं तर सकाळी पाच ला परत जावे लागेल मला.. मी नाही जाणार.. तुम्हालाच जायला लागेल.. समजलं? " पलीकडून चिडलेला आवाज.
" हो. हा निघालोच. मिळेल तू नको काळजी करुस " फोन कट करुन खिशात टाकला.
त्या फोनने त्याची झिंग पुर्ण उतरली होती.
गाडीवरुन उतरुन तो समोर दुध देणाऱ्या भैया कडे गेला.. तिथून दुध घेऊन पुन्हा गाडीकडे आला पिशवी हँडलला अडकवून गाडीला किक मारली.
झिंग.... हळूहळू उतरत होती..
- बिझ सं जय ( १६-१०-२०१६)